’n Gewas moet op die regte tyd en in die optimale groeistadium geoes word om die beste resultate vir diereproduksie te verseker, het prof. Robin Meeske, spesialiswetenskaplike van die WesKaapse departement van landbou se Outeniqua-proefplaas op George, op die jaarkongres van die Herkouerveterinêre-vereniging van Suid-¬Afrika (RuVasa) op Polokwane gesê.
Kuilvoer word al vir eeue gemaak, maar boere maak nog steeds foute wat die kuilvoer se gehalte benadeel en dus nie die maksimum vleis of melkproduksie per hektaar verseker nie.
Kuilvoer wat goed bewaar word, kan vir baie jare opgeberg word, mits lug of water die dit nie binnedring nie. Gevolglik moet die kuilvoer deeglik gekompakteer en met ’n plastiekstrook verseël word om water en lug uit te hou. Dit is raadsaam om die plastiekstrook teen die son te beskerm as die kuilvoer vir langer as ’n jaar opgeberg moet word. ’n Laag grond sal voldoende wees.
Hy het gesê indien vog onder by die kuilvoerbunker uitvloei, is die persentasie droë materiaal (DM) minder as 25%. ’n Maklike toets is om ’n handvol kuilvoer hard te druk. As daar vog uitkom, is die DM te min en sal verrotting intree. Die DM moet 30% tot 35% wees, wat inkuiling op die regte groeistadium van die gewas, byvoorbeeld mielies, noodsaaklik maak.
’n Duimreël is wanneer die onderste blare aan die plant begin droog word en die pitte in 50% tot 75% melkstadium is. Kleingraan soos hawer moet in die sagtedeegstadium geoes word.
