Volgens Mitsubishi Motors Suid Afrika (MMSA) gaan sy nuwe Pajero Sport se wiele glo in September vir die eerste keer op die Suid-Afrikaanse bodem draai. Dit is hoog tyd dat Mitsubishi sy nuwe Pajero Sport in die plaaslike mark loslaat, waar strawwe mededinging van die veel nuwer Fortuner (van Toyota) en Everest (van Ford) heers.
Die nuwe Pajero Sport spog nie net met ’n nuut-gestilleerde en moderne bakontwerp nie, maar etlike tegnologiese verbeteringe, soos onder meer ’n nuwe agtgang outomatiese ratkas, sorg vir uitsonderlike bestuursdinamika. Dit is veral die voorkant van die nuwe bakwerk wat ’n besliste teenwoordigheid op die pad èn in watter parkeerterrein ook al skep.
Spoggerig en taai
Die (nuwe) Pajero-eienaar sal nie na sy voertuig in ’n pakeerterrein hoef te soek nie, hy sal dit sommer gou-gou raaksien … en só ookal die ander mense! Die nuweling is ontwerp vir ’n elke-dag-voertuig wat ewe tuis is in stadsverkeer as op die oop pad, en ook nie skrik vir grondpaaie en veldry se hindernisse in die boendoes nie.
Drywing kom van ’n nuwe geslag liggewig turbo-dieselenjin met ’n aluminiumenjinblok wat ’n agtgang outomatiese ratkas inspan om die enjinkrag na die wiele oor te dra. Die viertrekweergawes span ook hierdie outomatiese ratkas in. Mitsubishi se unieke Super Select II-4 viertrekstelsel bied ’n oordraratkas met laestrek.
Mitsubishi glo sy nuwe Pajero Sport is eenvoudig by uitstek dié voertuig vir die moderne avonturier. En terloops, net miskien is hy reg, want die nuweling spog reeds met vier internasionale toekennings komende van Thailand, Indonesië, Nieu-Seeland en die Oekraine!
