Toyota se FT-4X konsepvoertuig het pas sy debuut op die internasionale New York-voertuigskou gemaak en te oordeel aan die ge-‘oe’ en ge-‘aa’ is hier beslis ’n ding aan die kom!
Hoewel die FT-4X ’n kleiner viertrek-stoftrapper is, dra dit duidelik die familietrekke van Toyota se veel groter FJ Cruiser. Dit is die vars en futuristiese ontwerp van Toyota se Calty Design Research Studio in Kalifornië.
Die FT-4X lyk soos ’n kompakte stoftrapper waarin eenvoud, styl èn doeltreffendheid saamgesnoer word. Toyota hoop waarskynlik dit doen dieselfde vir sy aansien (èn verkoopsyfer) as wat die RAV4-stoftrappers in die 1990’s gedoen het.
Die FT-4X is op Toyota se C-onderstel geskoei. As produksiemodel sal dit waarskynlik met ’n kleinerige viersilinderenjin en ’n meganiese viertrekstelsel met laestrek toegerus word. En kyk net daardie grondvryhoogte en hóé daardie skurwe wiele (225/55R18 veelterrein-buitebande) só op die hoeke geplaas is… slaggereed vir enige hindernisse! Terloops, MacPherson-strutte voor en dubbel-mikke agter sorg vir die veerwerk.
Die ontwerpers het hulle omtrent gate uit geniet om hierdie konsepmodel as ’n soort van ’n ekspidisievoertuig toe te rus. Daar is van ’n ingeboude GoPro-kamera tot ’n warm èn koue kompartement vir voorrade en versnaperinge!
