Die verkope van botter en voorafverpakte kaas het in die 12 maande tot einde Maart 2014 skerp gestyg.
Mnr. Alwyn Kraamwinkel, uitvoerende hoof van die Suid-Afrikaanse Melkprosesseerdersorganisasie (Sampro), sê die hoeveelheid voorafverpakte kaas wat aan die kleinhandel verkoop is, het met 25,5% gestyg en dié van botter met 17,2%.
Hierdie tipe kaas het goed verkoop danksy die lae prysstyging van 1,49% en omdat mense eerder kaas koop wat aantreklik verpak is, as kaas wat in die kleinhandel gesny en verpak is. “Meer botter is verkoop danksy groter erkenning van die waarde van botter en die lae prysstyging van 3,86%,” sê Kraamwinkel.
Die verkope van vars melk en roomkaas het gedaal, maar dié van langlewemelk het gestyg. “Die prys van langlewemelk het tot verlede jaar vir ’n paar jaar minder gestyg. Die jongste inligting toon dat dit tans met 7,81% gestyg het en dié van vars melk met 7,62%. “Verbruikers gebruik meer suiwelprodukte, maar teen kleinhandelspryse wat nie die suiwelbedryf in staat stel om die kostestyging wat die bedryf ervaar, voldoende te verhaal nie,” sê Kraamwinkel.
