Volkswagen het sy Tiguan sportnutsvoertuig (SNV) teen die einde van verlede jaar effe opgekikker en ontrimpel, maar dit was steeds slegs net met die 92 kW- en 110 kW 1.4 TSI-petrolenjins beskikbaar. Voortaan spog die reeks ook met 2.0 TDI (turbo-diesel)-enjins met drywing van 81 kW, 105 kW en 130 kW asook die kersie-op-die-koek 2.0 TSI (petrol) wat oor 165 kW drywing beskik.
Alle hoë werkverrigting modelle word met Volkswagen se verbeterde 4MOTION-vierwielaandryfstelsel toegerus. Hierdie baie gevorderde stelsel omskep die Tiguan-stoftrapper in ’n ware vastrapper op moelike terrein. Gelukkig het Volkswagen ook besluit om die grondvryhoogte met 10 mm tot 201 mm te verhoog.
’n Spesiale “Off-Road”- pakket is bykomende beskikbaar wat die voertuig se aantreehoek van die gewone 18.3 grade tot 25.6 grade vergroot. Die vertrekhoek is 24.7 grade en die oortreehoek 20 grade. Afhangende van die enjin/ratkaskeuse kan die Tiguan vragte van tot 2 200 kg sleep.
Alle Tiguan-modelle word verkoop met ’n diensplan van vyf jaar of 90 000 km, ’n waarborg van drie jaar of 120 000 km en teenroeswaarborg van 12 jaar. Hierdie pryse sluit BTW in en die diensintervalle is elke 15 000 km.
Die Tiguan-reeks se pryse strek van R384 100 vir die intreevlak 1.4 TSI 92 kW Trendline tot R549 500 vir die topmodel 2.0 TDI 130 kW Highline 4MOTION DSG. Hierdie pryse sluit BTW in.
