Jan Christiaan Smuts was ’n soldaat, staatsman, intellektueel en een van Suid-Afrika se grootste leiers. Tog word daar vandag min oor hom gepraat of geskryf.
In Afrikaner sonder Grense voer Richard Steyn aan dat hierdie indrukwekkende kryger-staatsman se lewe en denke ’n herbesoek werd is, omdat daar soveel te leer is uit sy merkwaardige prestasies.
Dis ’n hoogs leesbare boek waarin Smuts se rol as politieke leier en as adviseur van wêreldleiers, sy geestelike en intellektuele lewe en sy verhoudings met vroue ondersoek word. Smuts het ’n unieke bydrae gelewer op verskeie terreine, waaronder botanie, bewaring en filosofie.
Die boek skram ook nie weg van die teenstrydighede in Smuts nie. Hoewel hy een van die argitekte van die Verenigde Nasies en ’n groot kampvegter vir menseregte was, het hy die swart meerderheid by die politiek van die land uitgesluit.
Steyn is ’n oud-Matie wat die regsberoep vir die joernalistiek verruil het. Hy was onder meer redakteur van Natal Witness, ’n Nieman-genoot aan Harvard-universiteit en hoofredakteur van The Star. Hy was ook Standard Bank se direkteur van korporatiewe sake en kommunikasie. Deesdae skryf hy voltyds.
Jonathan Ball Uitgewers gee vyf eksemplare van Afrikaner sonder Grense weg aan Landbouweekblad-lesers. Al wat jy moet doen om in aanmerking te kom, is om jou naam en e-posadres na webred@landbou.com te stuur, met Boekprys in die onderwerpsveld. Die sluitingsdatum is 28 Februarie.
