As wynprodusente onder die Fairtradevaandel is Bosman Family Vineyards verbind tot volhoubare praktyke wanneer dit by wynmaak kom. In hul soeke na meer natuurlike wyne het dié wynplaas in Wellington hul nuutste projek onthul - ’n oranjewyn gemaak van Grenache blanc-druiwe.
Oranjewyn is tans ’n modegier regoor die wêreld, maar is oorspronklik van Georgië en Armenië. Die wyn word soos rooiwyn gemaak. Tydens fermentasie word die wyn in kontak met die doppe gebring en dit veroorsaak dat tanniene, fenole en geure vorm, asook die oranje kleur van die wyn.
Die wyn word oor drie weke natuurlik gegis. Dit beteken dat die fermentasieproses geensins aangehelp word nie. Die doppe word uiteindelik in ’n pres sag gedruk en die wyn word in ouer houtvate geplaas. Vir Corlea, die wynmaker op Bosman Family Vineyards, was dit belangrik om te verseker dat die wyn steeds tegnies korrek gemaak word. Om te verhoed dat die wyn oksideer het sy klein hoeveelhede swaeldioksied byvoeg.
Hierdie unieke kleur wyn is vernoem na die Bosmanfamilie se oortuiging: Fides, Spes et Amor, wat geloof, hoop en liefde beteken, en is ’n moderne interpretasie van oranjewyn.
Die Fides 2013 oranjewyn is die eerste reeks van interessante en ongewone wyne wat deur Bosman Family Vineyards gemaak is. “Wees op die uitkyk vir ons volgende reeks, want ons het baie idees,” sê Corlea.
Die wyn is slegs beskikbaar op die plaas en kan ook vanaf hul webwerf, www.bosmanwines.com, teen R150 ’n bottle bestel word.
