UIT NOOD GEBORE
Mnr. Bertus Goosen van Lobatse, Botswana, se werkbank met ’n klein aambeeld en bankskroef is deur die beoordelaars as uiters doelmatig bestempel. Dié boereplangeesdriftige was die wenner in die afdeling vir aangepaste masjinerie, werktuie en landboutoerusting. Goosen, wat met beeste, skape en varke boer, asook graan en hooi verbou, sê aan die begin van die covid-19-inperking kon hy nie hoefysters in die hande kry nie. Hy het die aambeeld van ’n treinspoorstaaf gemaak om ou hoefysters weer diensbaar te maak. Hy het dit op ’n dik staalplaat gemonteer. Die pote kan afskroef as die werkbank vervoer moet word. Die aambeeld het gleuwe waarin ’n hoefyster verstel kan word en gate waarin ou spykers wat vassit, uitgeslaan kan word. Die hoefyster kan ook op die werkbank reguit getimmer word. Besoek Landbou.com vir ’n video hiervan.
NAVRAE: Mnr. Bertus Goosen,
00264 71 680 498.
Talle boereplanne wat plaaswerk doeltreffender maak, het vanjaar aandag getrek in die boereplannekompetisie, wat Graan SA saam met Omnia Nutrilogie® en Landbouweekblad aanbied.
Die inskrywings vir die gewilde Nampo-boereplannekompetisie was vanjaar dalk nie die grootste nóg nie, maar dit bly ’n fassinerende uitstalruimte van vindingrykheid. Dr. Pieter Taljaard, uitvoerende hoof van Graan SA, het op die prysuitdelingsgeleentheid gesê Nampo gaan oor ’n visie, nuwe idees en tegnologie.
“Ons wil seker maak die boer het baie dinge om op te konsentreer om volhoubaar en winsgewend te wees. Hierdie vernuwende planmakers dra daartoe by.”
Teken in op Landbou.com en kry toegang tot die beste joernalistiek en eksklusiewe produkte.
