Suid-Afrika se vleisbeesbedryf het ’n paar struikelblokke wat dit kniehalter. Aan strukturele kwessies, soos die verlies aan die bogrond en die swak toestand van die veld in Suid-Afrika se beesweistreke, kan iets gedoen word.
Die uitgediende vleisgraderingstelsel en afwesigheid van ’n doeltreffende nasionale naspeurbaarheidstelsel is regulatoriese hindernisse en kan nie bloot aan die owerhede oorgelaat word nie. Hoe vinniger druk uitgeoefen word om dit te verander, hoe beter.
Volhoubare landbou is die produksie van gewasse en vee in harmonie met die natuur om natuurlike hulpbronne in stand te hou en te bewaar. Myns insiens moet die toepassing van dié gonswoord met wins begin, aangesien landbou wat nie winsgewend bedryf word nie, nie volhoubaar is nie.
