Met die prysgeld van R50 000 het sy toerusting gekoop om haar produk, Ghemere, te bemark. Dit is ’n nie-alkoholiese gemmerbier met ’n tradisionele, eg Suid-Afrikaanse smaak. Danksy die blootstelling wat sy met haar prys gekry het, kon sy haar produk aan ’n paar verskaffers bemark.
Die produk word nou wyer bekend en word as konsentraat en in klaarbereide formaat bemark. Vyf liter konsentraat kan tot 20 liter aangemaakte gemmerbier lewer. Die konsentraat is ook in 2 liter-formaat te koop.
Moshawa hoop die handelsmerk kan ’n huishoudelike naam in Suid-Afrika word. Dit is tans in Food Lover’s-winkels in Gauteng beskikbaar, aanlyn op Moshawa se Facebook-winkel GhemereSA, asook in ’n geskenkverpakking saam met First Watch se whisky by Makro-drankwinkels landwyd.
