Sy is dalk ’n plaasmeisie in murg en been, maar ’n gewone boervrou is Julie Hobson beslis nie. “Hoewel ek op ’n plaas grootgeword het, het ek dit die grootste deel van my lewe probeer vermy om met ’n boer te trou. In die proses het ek ’n hele paar paddas gesoen,” sê sy laggend oor die foon.
Met ons gesprek neem sy ’n blaaskans tydens die opruimingswerk ná haar en haar man, Sean, se suksesvolle Heritage Angora-ramveiling die vorige dag op die plaas Wheatlands naby Jansenville. “Op ’n manier was dit dus asof ek huis toe gekom het toe ek wel weer op ’n plaas kom woon het.
“Ek is in my wese ’n entrepreneur en ek sien soveel potensiaal in die landbou vanuit ’n sake-oogpunt. Ek het ook besef as ek in die sakebedryf wil wees, moet dit ’n landboubesigheid wees.” Dié besef het in ’n merkwaardige droom tot Julie deurgedring.
