Die Clanwilliam-sandvis (Labeo seeberi), oftewel die onderbekvis, is endemies aan slegs die Olifants-Doringrivierstelsel (ODRS) in die Wes-Kaap se Cape Fold Ecoregion (CFE) en word deur die internasionale unie vir natuurbewaring (IUCN) as bedreig beskou.
Ouer mense in die onderbekvis se gebied kan nog die ontelbare broeiende visse in die vlak water van die ODRS onthou – ’n natuurwonder wat vandag beperk is tot nog net ’n paar sytakke van die Doringrivier, waaronder die Biedouw.
Die ingrypende afname die afgelope paar dekades in die voorkoms en bevolking van die onderbekvis het twee wetenskaplikes, drs. Jeremy Shelton, ’n bewaringsbioloog by die varswaternavorsingsentrum (FRC) in Kaapstad, en Otto Whitehead, ’n onafhanklike ekoloog en filmmaker, oortuig om die Saving Sandfish-projek (SSP) in 2018 te begin.
