Vir talle boere in die Boesmanland is dié skaaptrek te voet sedert die vroeë 1800’s die enigste manier van boer.
Verlede jaar kon boere in die Boesmanland ná bykans vier jaar weer met hul skape tussen weiding trek. By die Fred Turner-museum op Loeriesfontein is dit me. Elna Brand wat dié geskiedenis laat voortleef met haar staaltjies en ’n volledige uitstalling van die Boesmanland-trek.
Die uitstalling is lewensgetrou met ’n volledige trekwa, tent en skerm. Elna vertel dat mense in die tent kan instap. “Op ’n manier verplaas dit jou nogal na ’n ander tyd.” Binne-in die tent is ál die besittings wat mense saamgetrek het tussen die twee gebiede. Soms was dit ál hul besittings wat saamgegaan het.
