Chowder is die naam vir ’n dik, ryk en romerige sop waarvan aartappels meestal een van die bestanddele is.
- 6 repe spekvleis, fyngesnipper
- 45 ml botter
- 1 ui, fyngekap
- 3 knoffelhuisies, fyngekap
- 45 ml koekmeel
- 1 kg aartappels, geskil en in baie klein blokkies gesny
- 1 liter goeie hoenderaftreksel
- 125 ml room
- 400 ml melk
- Sout en witpeper na smaak
- Ekstra spek (bros gebraai), gesnipperde grasuie, suurroom en gerasperde beleë cheddar, om voor te sit
Braai die spek in ’n groot swaarboomkastrol in die botter tot gaar.
Voeg die ui en knoffel by en braai verder tot die ui baie sag is.
Sprinkel die koekmeel oor en roer, terwyl die mengsel borrel.
Voeg die aartappels en hoenderaftreksel by.
Verhit tot kookpunt en prut tot die aartappels amper sag is, terwyl nou en dan geroer word.
Voeg nou die room en melk by en geur na smaak met sout en peper.
Prut verder tot die aartappels baie sag is.
As jy die sop lekker dik wil hê, gebruik ’n aartappeldrukker om die helfte van die aartappelblokkies in die sop fyn te druk.
Kook dit weer vinnig deur en skep op.
Rond elke porsie sop af met bros spek, gesnipperde grasuie, ’n skeppie suurroom en gerasperde kaas.
Lewer 4-6 porsies.
