250 g sagte botter
250 ml versiersuiker, gesif
10 ml vanieljegeursel
750 ml koekmeel
100 g wit sjokolade, fyn gekap
Verroom die botter en versiersuiker goed tot lig en donsig. Voeg die vanieljegeursel by. Sif die meel oor en maak aan tot ’n deeg. Draai toe in kleefplastiek en verkoel vir minstens 1 uur. Voorverhit die oond tot 170 °C. Rol die deeg uit op ’n meelbestrooide oppervlak en druk hartjies uit. Pak die koekies versigtig op bakplate wat met bakpapier uitgevoer is.
Verkoel die koekies tot die oond die regte temperatuur bereik het en bak dan vir ongeveer 7-10 minute tot strooikleurig. Haal uit die oond en laat effens op die bakplaat afkoel voor jy dit verder op draadrakke laat afkoel. Smelt die sjokolade in die mikrogolf of in ’n dubbelkoker en giet in ’n plastieksakkie.
Knip ’n klein puntjie van die sakkie af en spuit die sjokolade in dun strepies oor die koekies. Laat hard word en bêre tussen lae waspapier in ’n lugdigte houer.
Lewer ongeveer 40 koekies.
