Beslag
250 g ontpitte dadels, fyngekap
5 ml koeksoda
180 ml kookwater
45 ml sagte botter
180 ml donkerbruinsuiker
1 ekstragroot eier
10 ml vanieljegeursel
500 ml koekmeel
20 ml bakpoeier
10 ml paasspeserymengsel
5 ml sout
160 ml fyngekapte pekanneute
Stroop
250 ml suiker
180 ml water
1 kaneelstokkie
60 ml brandewyn
30 ml botter
5 ml vanieljegeursel
Voorverhit die oond tot 180 °C. Smeer ’n losboomkoekpan van 25 cm met botter. Voer uit met bakpapier en smeer weer.
Sit die fyngekapte dadels in ’n bak, sprinkel die koeksoda oor en giet die kookwater oor. Roer en laat staan vir 10 minute.
Terwyl die dadels sag word, verroom die botter en suiker goed tot lig en donsig. Voeg die eier en vanieljegeursel by en klits goed. Sif die koekmeel, bakpoeier, speserye en sout saam. Voeg die geroomde bottermengsel en fyngekapte pekanneute by. Gee die beslag ’n paar roere en voeg nou die dadelmengsel by.
Meng goed en skep in die voorbereide pan. Bak die koek vir 40-45 minute tot deurgaar.
Maak die stroop terwyl die koek bak: Verhit die suiker, water en kaneelstokkie oor lae hitte tot die suiker opgelos is. Verhit tot kookpunt en kook vinnig vir 1 minuut. Verwyder van die hitte en roer die brandewyn, botter en vanieljegeursel by.
Prik die koek met ’n sosatiestokkie of toetspen en skep die kokende stroop daaroor sodra die koek warm uit die oond kom. Laat staan sodat die stroop kan intrek. Laat die koek in die pan afkoel tot kamertemperatuur en verkoel tot benodig.
Sit voor met geklopte room waarby ’n titseltjie fyn kaneel ingevou is.
Lewer 12-16 porsies
