Beslag
250 g donkersjokolade, fyngekap
60 ml gouestroop of esdoringstroop
250 ml klam bruinsuiker
3 ekstragroot eiers, geklits
3 groot, gaar bete (ongeveer 250 g), fyngerasper
100 ml karringmelk
60 ml olie
320ml bruismeel
75 ml kakao
3 ml koeksoda
125 ml gemaalde amandels
Ganache
100 g donkersjokolade, gekap
100 ml room
Voorverhit die oond tot 180 °C en smeer ’n middelslag-ringkoekpan met olie of bespuit met kleefwerende kossproei. Smelt die sjokolade oor lae hitte of in die mikrogolf tot glad. Voeg die goue- of esdoringstroop, bruinsuiker, eiers, gerasperde beet, karringmelk en olie by en meng goed. Sif die meel, kakao en koeksoda oor en vou die gemaalde amandels in.
Giet die beslag in die voorbereide pan en sit die pan in die oond. Verlaag die oondtemperatuur tot 165 °C en bak vir ongeveer 70 minute of tot daar nog ’n paar klam krummels aan ’n toetspen vassit wat in die middel van die koek gesteek word. (Die koek moet klam wees in die middel wanneer dit afgekoel het.)
Laat vir ’n paar minute in die pan afkoel en keer uit op ’n draadrak om tot kamertemperatuur af te koel. Ganache: Smelt die sjokolade en room oor lae hitte saam tot glad, laat effens afkoel en skep oor die koek. Sit die koek net so voor of versier dit verder soos op die foto of na jou smaak.
Lewer 12 porsies.
