1 lamsboud van ongeveer 2,5 kg
Sap van 1 suurlemoen
2 knoffelbolle
Ongeveer 7 ansjovisfilette, grof gekap
Sout en vars gemaalde swartpeper na smaak
30 ml droë roosmaryn
Olyfolie
Klontjie botter
Voorverhit die oond tot 160 ºC. Sit die boud op ’n groot vel bakpapier neer en steek gaatjies oral oor die vleis met ’n skerp mes. Breek een van die knoffelbolle oop en skil die huisies af. Sny elke knoffelhuisie in stukkies en stop die boud daarmee. Skep die gekapte ansjovisfilette op die boud en smeer egalig.
Geur die boud goed met sout en peper. Sprinkel droë roosmaryn oor en bedruip met olyfolie. Sny die orige knoffelbol in die helfte deur en sit dit by die die vleis. Vou nou die boud stewig toe in die bakpapier en sit dit in ’n oondbak. Bedek die oondbak met ’n deksel of foelie. Bak die boud vir 30 minute per 500 g. Haal die boud uit die oond en maak die bak oop. Haal die boud uit die bakpapier en sit eenkant neer.
Gooi al die pansouse en knoffelhuisies in ’n kastrol en kook dit met ongeveer die helfte af. Verhoog die oondtemperatuur tot 190 ºC. Sit nou die boud op ’n bakplaat en oondrooster vir ’n verdere 30-40 minute tot goudbruin. As die sous afgekook is, giet dit deur ’n sif en druk al die knoffelhuisies met die agterkant van ’n lepel sodat die knoffelpuree ook deel vorm van die sous.
Roer ’n klontjie botter by die warm sous en sit saam met die vleis voor.
Lewer 8-10 porsies.
