Net ’n hand vol bestanddele, maar ’n ete propvol geur en lekkerte.
- 300 g pasta van jou keuse
- 5 uie, dungesny
- 100 g botter
- 6 knoffelhuisies, fyngekap
- Sout en varsgemaalde swartpeper
- 5-10 ml suiker
- 1 houer (200 g) roomkaas
- 125 ml warm melk
- 375 ml gerasperde, beleë cheddar
- Grasuie, om af te rond
Kook die pasta in ’n groot kastrol met vinnig kokende soutwater tot gaar, maar steeds ferm.
Terwyl die pasta kook, sit die uie, botter, knoffel, sout, peper en suiker in ’n swaarboompan met ’n styfpassende deksel en verhit oor lae hitte tot die uie begin smoor.
Smoor tot die uie sag is (haal die deksel een of twee keer af om die mengsel deur te roer, maar bedek die pan dan weer dadelik).
Sodra die uie sag is, haal die deksel af en braai verder tot die uie gekaramelliseer is.
Voeg die roomkaas en melk by, skakel die stoofplaat af en bedek weer die pan.
Laat die hitte van die pan die roomkaas smelt. Roer dan goed om ’n sous te vorm.
Dreineer die pasta en voeg die warm pasta by die romerige uiesous.
Meng die helfte van die cheddar by die warm pasta en sous en sprinkel die res oor.
Rond af met gesnipperde grasuie en sit dadelik voor.
Lewer 4-5 porsies.
