Hoe gemaak as jy ’n groter kajuit soek, maar nie te veel laaibakruimte wil inboet nie? Die antwoord was nog altyd daai bakontwerp tussen ’n enkel- en dubbelkajuit: die kajuit-en-’n-half. Ford se jongste Ranger-reeks bied nou ’n supercab-bakontwerp, vir kopers wat die BTW-belastingvoordeel van ’n werksbakkie wil gebruik, sonder om te veel luukshede van ’n dubbelkajuit in te boet.
Die Ranger-supercab se pryse begin by R485 400 vir ’n 2.0 SiT XL 4x2 met ’n handrat. Ford se XL-bakkies is gemaak vir plaaslewe, met staalwiele, maar ook ’n besonder gevorderde tikskerminligtingstelsel. Hierdie intreevlak-supercab gebruik Ford se 2 liter-turbodieselenjin, wat 125 kW en 405 Nm lewer. Vastrapvermoë word verskans deur ’n agterste ewenaarslot, vir wanneer jy daai mielielande ná ’n wolkbreuk moet aandurf.
’n Trommel en sluitkassies
Hoekom moet jy ’n Ranger-supercab vir plaaswerk oorweeg? Weerbestande laairuimte is die een voordeel van ’n supercab bo ’n enkelkajuitbakkie. Ford bied sluitbare kassies wat jou gereedskap en ander toebehore veilig en droog sal hou in die ruimte agter die sitplekke.
Daar is ook ’n trommel gemonteer op die laaibak, wat op sy beurt in die bakwerkstruktuur gemonteer word. Dis ’n slim bykomende pakruimte vir gereedskap en toerusting en jy hoef nooit senuagtig te wees dat iemand dit uit die bakkie se laaibak kan steel nie omdat dit vasgemonteer is.
Ford sien ook die belofte van bruikbaarheid as 4x4-toervoertuig vir die Ranger-supercab. Met ’n groter laaibak as enige dubbelkajuit-bakkie, en daai voordelige pakplek agter die sitplekke, kan ’n supercab jou gunsteling-4x4-toerbakkie word. Dit is ook hoekom Ford die Ranger-supercab met die weelderige Wildtrak se afwerking bied.
Met sy kragtige 2 liter-dubbelturbodieselenjin het die Ranger Wildtrak-supercab uitstekende langpadtoervermoë. ’n Outomatiese tiengangratkas werk netjies met jou dieselverbruik en skakel daai dubbelturbodieselenjin se 500 Nm wringkrag om in moeitelose versnelling wanneer jy vragmotors op die snelweg wil verbysteek.
Binne-in die Ranger Wildtrak is ’n 12 duim-tikskermvermaakstelsel wat uitstekende klankgehalte deur nege Bang & Olufsen-luidsprekers bied. Vir eienaars wat hul Wildtrak-supercab verder wil uitrus, is daar ingeboude dakskakelaars met begeleide bedrading vir al jou broodnodige veldrybybehore soos kolligte, ’n wen-as en tweede batterystelsel.
Die Ranger Wildtrak-supercab se laaibak het ook ’n 240 V-kragpunt en hierdie bakkie se elektriese argitektuur is gebou om allerlei toestelle aan die gang te jou wanneer jy in die veld is. Hoe? Met ’n ingeboude 400 W-omsetter wat elektrisiteit na die laaibak en binneruim se kragpunte voer.
Ford bied die Ranger 2.0 BiT Wildtrak 4x4 supercab met die outomatiese tiengangratkas teen R772 800. As jy nie ’n dubbelkajuit-bakkie nodig het nie, is dit ’n besonder slim aankoop, veral wanneer jy byreken hoeveel belasting jy kan aftrek.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
