Of beter langpadtoervermoë, maar nie die plaas se lening wil rek vir ’n Fortuner of Land Cruiser 70-stasiewa nie?
Buiten ’n reeks hoogs suksesvolle bakkies en sportnutsvoertuie beoog GWM om vanjaar ook ’n meer geharde veldvoertuig aan Suid-Afrikaners te bied. GWM se Tank 300 het ’n treffende ontwerp, met ronde kopligte en ’n staalleerraam-onderstel vir geharde veldrytoestande.
Die Tank 300 is 35 mm korter as ’n Toyota Fortuner en het ’n voorkoms wat herinner aan ’n groter weergawe van Lada se Niva-reeks Russiese veldvoertuie.
Slim ontwerpdetails wys dat GWM se span begryp wat geharde veldrygeesdriftiges benodig. Die Tank 300 het reuse-plastiekwielboë wat baie ruimte skep vir wielbeweging oor strawwe veldryhindernisse. Hierdie wielboë bied eienaars ook die geleentheid om groter bande op die 17 duim-wiele te monteer as jy sagter ritgehalte op grondpaaie begeer – of meer lugvolume en loopoppervlak soek wanneer wiele afgeblaas moet word vir ry in die sand.
GWM se tegniese span het ook die Tank 300-noodwiel op die agterbak se swaaideur gemonteer, pleks van onder die voertuig, om toegang te vermaklik. As jy op warm Kalahari-rooiduinsand of op ’n rowwe gruispad moes lê om ’n noodwiel onder ’n voertuig uit te haal, sal jy die voordeel van daardie swaaideurmonteerpunt waardeer.
Geen dieselenjin nie
GWM bied nie ’n turbodiesel-enjin opsie met die Tank 300 nie, wat ’n teleurstelling is, omdat diesel steeds die brandstof van keuse vir Suid-Afrikaanse veldryvoertuie bly. Chinese vervaardigers is aangewese op petrolenjins en Tank 300 se turboaangedrewe 2 liter-viersilinder wek 167 kW en 389 Nm, wat wakker versnelling behoort te bied. Die enigste ratkaskeuse is ’n outomaties Duitse ZF-agtgang.
Verrigting? GWM roem daarop dat sy Tank 300 die 0-100 km/h versnellingstoets in 9,5 sekondes sal kafdraf, met brandstofverbruik van 9-10 liter/100km. In ons ervaring is die brandstofgebruik van Chinese enjins heelwat hoër as die vervaardigersyfers . . .
Is hierdie Chinese-veldvoertuig so bekwaam in strawwe toestande en oor rotsagtige roetes soos die voorkoms wil voorgee? Die Tank 300 het ’n grondvrye hoogte van 224 mm, en kan ’n waterhindernis wat 700 mm diep is, aandurf. Daar is ook ’n meer geharde Tank 300 met drie ewenaarslotte, 249 mm grondvrye hoogte en 900 mm-waterhindernis vermoë.
Buiten die voortreflike veldryvermoë behoort die Tank 300 ook uitstekende waarde te bied, soos GWM plaaslik bewys het met die P-Reeks-bakkies en Haval-sportnutsvoertuie. Daar is ’n selfparkeerfunksie, nege-luidsprekerklankstelsel, 12,3 duim-tikskermvermaakstelsel en alles werk netjies met jou slimfoon.
Iets wat die Tank 300 nie bied nie, is ’n derde ry sitplekke. Dit is een van die aspekte waar dié GWM-voertuig te kort skiet vergeleke met Toyota se Fortuner. Maar met ’n luukse binneruim, gehalte veldryvermoë en ’n treffende voorkoms kan GWM die markaandeel tussen die Jimny-vyfdeur en die Fortuner lag-lag verower. En soos GWM bewys het met die Haval, sal die Tank 300 na verwagting teen ’n baie billik prys later vanjaar plaaslik beskikbaar word.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
