Met die aanbied van Graan SA se 2022 kongres by Nampo-park in die distrik Bothaville in Maart het talle kongresgangers opmerkings gemaak oor die swak toestand van veral die dorp se paaie. Inwoners het opgemerk dat die plaaslike munisipaliteit nie gereeld onderhoud toepas nie en dat swak paaie se toestand verder verswak het namate swaar reën gedurende die somer oor die gebied uitgesak het.
“Die munisipaliteit het aangedui dat hy vandeesweek van die dorp se paaie sal herstel in afwagting op besoekers van die Nampo-oesdag volgende week,” sê mnr. Toit Wessels, assistent-bestuurder van bemarking by Graan SA en Nampo.
Wat die R30 vanaf Welkom via Allanridge na Bothaville betref, sê Wessels owerhede het aangedui dat herstelwerk aan dié pad teen die einde van die week so voltooi behoort te wees dat dit begaanbaar sal wees. “Ons hoop dit is die geval.”
Die pad was die die afgelope jaar al verskeie kere vir ’n tyd lank gesluit weens onder meer verspoelings ná swaar reën. Dit was ook telkemale in die nuus weens ongelukke, die swak toestand van die pad en ’n grondwal wat in ’n stadium oor die pad gegooi is.
Wessels sê die R700 van Bloemfontein na Bultfontein is in ’n swak toestand met baie slaggate, so ook die R719 tussen Bultfontein en Wesselsbron. “Diegene wat van Bloemfontein reis, kan die N1 na Kroonstad en dan die R76 na Viljoenskroon en die R727 na Bothaville oorweeg.”
Padwerk aan die R76 tussen Parys en Viljoenskroon en tussen Viljoenskroon en Bothaville is afgehandel en dié pad is in ’n goeie toestand. “My raad aan diegene wat van die OR Tambo-lughawe, Johannesburg of Pretoria af gaan ry, is om na Parys op die N1 te ry en dan van daar af met die R76 na Bothaville,” sê Wessels.
Die R30 tussen Klerksdorp, Orkney en Bothaville het talle slaggate. Dié pad se toestand het agteruitgegaan vanweë die seisoen se goeie neerslae.
Die Nampo-oesdag vind van 16 tot 20 Mei plaas. Dit is die eerste keer dat dit oor vyf dae aangebied word.
