Altesame 150 renosters is al in die eerste kwartaal van vanjaar in Suid-Afrika gestroop, met die Krugerwildtuin wat 87 verloor het, sê die Departement van Omgewingsake en Waterwese. Luidens ’n verklaring is 90 vermeende stropers in dieselfde tyd aangekeer.
Die departement het vroeër vanjaar as deel van die ingrypingsmaatreëls teen stroping onderneem om nie jagpermitte vir die trofeejag van renosters uit te reik aan jagters afkomstig van lande wat nie wetgewing teen stroping het nie.
As deel van dié stap werk die departement en die ministerie van landbou en landelike Ontwikkeling in Viëtnam saam om te voorkom dat wetgewing in dié verband in die twee lande uitgebuit word. Die departement het die ministerie verder versoek om inspeksies te doen om vas te stel of die trofeejagters wat wel al renosters gejag het, steeds die volle trofee het.
Mosambiek en ’n heining
Me. Edna Molewa het met mnr. Fernando Sumbana, Mosambiekse minister van toerisme, gepraat oor die groot aantal stropings (252) wat die Krugerwildtuin verlede jaar getref het.
Sumbana het sy regering se verbintenis tot die bewaring van die omgewing herbevestig en gesê wetgewing om dit te bewerkstellig is een van hul voorrangsake.
Die moontlikheid van die oprig van ’n heining as westelike grens van die park is weens koste-implikasies afgekeur. Molewa het met verteenwoordigers van die Departement van Openbare Werke in die park vergader, wat aangedui het dat so ’n heining te duur sal wees en dat dit te moeilik sal wees om te onderhou.
’n Buffersone tussen die park en private wildreservate en -plase in Suid-Afrika en Mosambiek word tans as oplossing oorweeg.
Wat die ontplooiing van 150 bykomende wildbewaarders in die park betref, ondergaan 75 nuwe bewaarders tans opleiding. Die opleiding behoort vir ses weke te duur.
30 Maart 2012
