ZAR X, wat in 2017 begin verhandel het, se lisensie is met onmiddellike ingang deur Suid-Afrika se finansiële waghond, die gedragsowerheid vir die finansiëledienstesektor (FSCA), gekanselleer. ZAR-X moet luidens ’n verklaring deur die FSCA binne vyf dae alle persone wat deur die kansellasie geraak word, in kennis stel om op te hou aandele verhandel en binne 14 dae die denotering van al sy genoteerde aandele voltooi. Die besluit is in oorleg met die Reserwebank geneem.
Dié stap volg op ’n lang stryd deur ZAR X om aan die likiditeitsvereistes vir beurse te voldoen. Die FSCA het sy lisensie reeds in Augustus 2021 opgeskort omdat hy nie voldoen het aan die vereistes oor die minimum wat ’n beurs in likiede kapitaal, soos kontant, eenkant moet hou nie.
Hierna het die twee groot landboumaatskappye wat destyds op sy platform sake gedoen het, Senwes en TWK, die verhandeling van hul aandele elders verskuif. TWK se aandele word nou op die Kaapstadse Aandelebeurs (CTSE) verhandel. Senwes en Agribel se aandele word tot verdere kennis oor die toonbank verhandel.
Toe ZAR X in 2017 begin verhandel het, was dit die eerste alternatief tot die JSE in 60 jaar. Die beurs is destyds wyd geloof vir sy sakemodel van “onmiddellike vereffening” wat beteken dat geld en aandele dadelik ná die transaksie beskikbaar is.
In 2018 het die Openbare Beleggingskorporasie (OBK) ’n belang van 25% in ZAR X gekoop en mnr. Etienne Nel, uitvoerende hoof van ZAR X, het aangedui dat die beurs beoog om ’n sterk landbou-indeks te bou. Maar teen 2020 het ZAR X in finansiële moeilikheid beland weens die impak van die covid 19-pandemie, terwyl ’n oorsese belegger se transaksie om ’n beherende belang in die beurs te kry, gesloer het. In Augustus 2021 is sy lisensie opgeskort weens die likiditeitsvereiste wat nie nagekom is nie. ZAR X het toe aangevoer sy unieke sakemodel moet in ag geneem word wanneer die minimum bedrag bepaal word wat hy as kontant moet hou.
Die besluit om uiteindelik ZAR X se lisensie amptelik te kanselleer is nie ligtelik geneem nie, het me. Unathi Kamlana, kommissaris van die FSCA, gesê. “Die besluit volg op ’n verlengde proses waar die FSCA vir ZAR X probeer help het om aan die regulasies te voldoen. Die proses het nie gunstige resultate getoon nie.”
Daar is tans vyf aandelebeurse in Suid-Afrika, insluitend die JSE.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
