Die mens het nog sowat tien jaar oor om die aarde op ’n pad van volhoubaarheid te plaas, meen honderde wetenskaplikes.
Luidens ’n berig op Nuus24.com het ’n groep wetenskaplikes tot dié gevolgtrekking gekom op die Planet under Pressure-beraad wat in London gehou is.
Dié beraad is aangebied met die oog op die Rio+20-beraad oor volhoubare ontwikkeling wat in Junie vanjaar in Brasilië plaasvind.
Skaal
Die groep sê in ’n mediaverklaring as dit nie gedoen word nie, sal die skaal begin kantel en die skade aan alle lewe op aarde sal onherstelbaar wees.
Die groep waarsku dat as die mens nie sy leefstyl “drasties” verander nie, sal hy die ooggetuie wees van die ineenstorting van verskeie natuurlike stelsels. “Stelsels, soos die oseane, landbougrond, vars water en skoon lug, wat help om die mens se lewe op aarde te onderhou,” lui die berig.
Die groep het onderneem om vir die eerste keer in die geskiedenis sy bevindinge tot voordeel van die planeet en sy bewoners beskikbaar te stel. Hulle sal onder meer ook:
- Probeer om die bruto binnelandse produk (BBP) te vervang met ’n meting van ekonomiese groei wat die omgewing en maatskaplike gelykheid insluit; en
- Om struikelblokke vir ontwikkelende lande te verwyder sodat hulle stem internasionaal duidelik gehoor sal word.
Bron: Nuus24.com
3 April 2012
