Wynbou
Internasionaal word slegs marginale groei in verbruik verwag. Amerika bly vir Suid-Afrika ’n groeiende hoëwaarde-markbestemming.
In Suid-Afrika word daar op mediumtermyn verwag dat oesvolumes sal aanhou daal omdat te min wingerde vervang word. Voortgesette groei in plaaslike verkope en die verwagte afname in produksie behoort druk op die huidige hoë volume te verminder.
Makadamias
Die marges in neutboerdery sal na verwagting baie winsgewend bly. Makadamias bly taamlik onbekend – navorsing oor gesondheid en verbruikerbewustheid is belangrik. ’n Toekomstige skuif na die gebruik van makadamias as bestanddeel word verwag.
Groente
Die handel in groente, soos wortels en uie, met die res van Afrika sal voortgaan om te ontwikkel en geleenthede aan produsente bied.
Pluimvee en eiers
’n Oorvloed vleisproteïen op die mark en ander faktore sal markpryse internasionaal en plaaslike in ’n dalende neiging hou. Pluimveeboere in Suid-Afrika sal klein winsmarges bly beleef totdat voervoorraad volgende jaar begin herstel. In die plaaslike eierbedryf moet die huidige aanbod daal vir pryse om te kan styg.
Suiwel
Die onlangse versterking van die wêrelduitvoerprys van afgeroomde en volroommelkpoeier kan op vroeë fases van herstel dui. Plaaslik sal produsentepryse na verwagting die onlangse styging in kleinhandelpryse vir melk volg. Die plaaslike vraag na melk sal verder verhoog namate melk ál meer in townships bekombaar raak.
Beesvleis
Internasionaal plaas prysdruk van mededingende proteïene weens oorvloedige voorrade druk op die mark. Plaaslik behoort die kuddeboufase ná die droogte pryse te ondersteun, maar hoër pryse sal weens ekonomiese druk met ’n mate van verbruikersweerstand begroet word.
Skaapvleis
Verwagte swak ekonomiese groei is slegte nuus vir die vraag na skaapvleis, maar langtermyn-vraagvooruitsigte lyk goed.
Varkvleis
Internasionaal bied groeiende handelsvooruitsigte met China uitvoergeleenthede. In Suid-Afrika is die langtermynvooruitsigte optimisties.
Wildbedryf
Pryse het oor die algemeen in die afgelope jaar gedaal. Meer diere was op formele veilings te koop. Die bedryf se teelsegment beleef prysdruk van vraag- én aanbodkant. Die mark vir wildsvleis is nog onontwikkel en bied geleenthede. Groei sal in die komende jare waarskynlik matiger wees.
