Die African Farmers’ Association (Afasa) het sy misnoeë oor die skorsing van mnr. Mike Mlengana, direkteur-generaal van Landbou, Bosbou en Visserye, te kenne gegee.
Mlengana, 'n voormalige voorsitter van Afasa, se skorsing vroeër vandeesmaand, het gevolg op die skorsing van mnr. Mdu Shabane, direkteur-generaal van die Departement van Landelike Ontwikkeling en Grondhervorming, in Desember 2016.
“Ons is baie besorg hieroor,” sê mnr. Aggrey Mahanjana, Afasa se sekretaris-generaal. “Die twee belangrikste departemente vir boere-ontwikkeling en -steun is nou sonder leierskap. Dit kan nie 'n goeie ding wees nie, omdat dit die bestuur van hierdie departemente en die lewering van dienste ontwrig.”
Ooreenkomste
Mahanjana het gesê mnr. Gugile Nkwinti, Minister van Landelike Ontwikkeling en Grondhervorming, het belowe sy departement sou die korttermyn-huurooreenkomste vir boere op regeringsgrond verleng of verbeter tot maksimum 30 jaar-ooreenkomste, of aan hulle die moontlikheid bied om teen einde Junie 2017 die grond te koop. Landbou.com het vroeër berig dat sommige boere nog wag op behoorlike ooreenkomste.
Verder is boere nog in die duister oor die departement se herkapitaliseringsprogram (Recap).
“Die minister het meer as 'n jaar gelede aangekondig dat hy die program sonder enige begroting na die Departement van Landbou, Bosbou en Visserye sou skuif.” Sedertdien het Afasa niks gehoor nie. Die organisasie wil weet of dit wel geskuif is en hoe dit kleinboere raak.
Beroep
Afasa het 'n beroep gedoen op die twee departemente se ministers om hul ondersoeke na die direkteurs-generaal te bespoedig en bestendigheid in die departemente terug te bring en te handhaaf.
“Ons het bestendige leierskap nodig om te verseker dat belangrike programme, soos die kommersialiseringsprogram en agriparke, behoorlik bestuur word en uiteindelik resultate lewer,” sê Mahanjana.
