’n Krans van altesaam 1 445 geel rose is by die departement van polisie se hoofkantoor gelê as deel van ’n veldtog teen plaasaanvalle, sê AfriForum.
Luidens ’n verklaring het die organisasie Donderdag (24 Mei 2012) terselfdertyd ’n griefskrif oor dié misdaad aan mnr. Nathi Mthethwa, Minister van Polisie, oorhandig.
In die griefskrif word die Regering gevra om plaasmoorde tot ’n prioriteitsmisdaad te verklaar en om spesialiseenhede vir landelike beveiliging op die been te bring.
Die rose verteenwoordig die minimum getal Suid-Afrikaners wat sedert 1990 op die land se plase vermoor is. Veertien foto’s, wat elk 100 mense verteenwoordig, is saam met die krans neergelê.
Naasbestaandes
Naasbestaandes van mense wat op plase vermoor is, het die geleentheid bygewoon om hul oorledenes te vereer en hul gesigte en name aan die statistieke te koppel.
Die organisasie sê hy wil nie plaasmoorde bo ander moorde in die land verhef nie. “Die werklikheid is wel dat boere in ’n disproporsionele mate vermoor word en dat die moorde dikwels met onmenslike gewelddadigheid gepaardgaan.
"Aangesien boere ’n belangrike rol in voedselsekerheid en werkskepping speel, behoort die Regering plaasmoorde tot ’n prioriteitsmisdaad te verklaar en spesialiseenhede daar te stel vir die beveiliging van die land se voedselprodusente,” aldus mnr. Ernst Roets, adjunk uitvoerende hoof van AfriForum.
24 Mei 2012
