Mnr. Jacques Broodryk, AfriForum se veldtogbestuurder, sê in ’n verklaring die ANC het in 2021 misluk om die Grondwet te laat wysig wat die onteiening van private eiendom sonder vergoeding moontlik sou maak.
“Die ANC het nou met ’n ekonomiese beleidsdokument met nuwe voorstelle oor grondhervorming vorendag gekom. Hierin word die skepping van ’n landbou-ontwikkelingsagentskap voorgestel wat verantwoordelik sal wees vir beleide en prosesse om die skenking van grond aan swart boere te bewerkstellig.
“Dit is om ’n aansporingsmeganisme soos SEB-erkenning te skep vir boere wat grond wil skenk of ondersteuning aan swart boere verleen. Die agentskap sal ook ’n grondhervormingsfonds stig en bestuur om die vordering van grondtransaksies te monitor en raad te gee oor vennote aan swart boere.”
Broodryk meen dis “nog ’n bedekte poging van die ANC om met eiendomsreg in te meng. Dit is hoogs onwaarskynlik dat die agentskap op ’n neutrale en regverdige manier gaan optree. Die party se bewerings dat die model van gewillige koper en gewillige verkoper misluk het, is onwaar aangesien die regering meer as R60 miljard aan grondhervorming bestee het. Slegs ’n geraamde 6,3% van die grond wat gekoop is, is aan private eienaars oorgedra. Die ANC is eintlik die onwillige verspreider van die grond wat hy opgegaar het.”
Hy is bekommerd oor die Land Bank se voorgestelde betrokkenheid. “Die bank het verliese van miljarde rande gely. In 2021 het die ouditeur-generaal in ’n verslag bevind dat die Land Bank se finansiële verliese vir die jaar tot 31 Maart 2020 met 211% tot R2,8 miljard gegroei het, vergeleke met ’n verlies van R902 miljoen in die vorige jaar.
“Die voorstel in die plan dat SEB-punte aan grondeienaars wat deelneem toegeken word, wys opnuut dat die ANC heeltemal rasbehep is,” sê hy.
“Al het die ANC die illusie probeer wek dat die geld vir die projek deur skenkings uit die private sektor ingesamel sal word, maak die beleid dit duidelik dat fiskale toelaes ook gebruik sal word om die projek te finansier. Weer eens gaan die belastingbetaler opdok.”
Hy sê die ANC is op die agtervoet. “Sedert sy parlementêre mislukking om die regering se diefstal van eiendom te wettig, raak hy al hoe meer desperaat om sy beleid af te dwing. AfriForum sal veg vir eiendomsreg en die staat se voortdurende inmenging in eiendomsbesit teenstaan.”
