Danksy delfstofbronne en die vasteland se onontginde landboupotensiaal sal die “kommoditeitshonger wêreld” toenemend na Afrika kyk vir internasionale strategiese beplanning.
Dít was oudpres. F.W. de Klerk se boodskap aan die Tilder-organisasie in Parys, Frankryk.
“Die Chinese – en ander nasies – stroom die vasteland binne om kontrakte vir Afrika se yster, kobalt, steenkool, vanadium en olie te sluit. Afrika is geseën met groot delfstofbronne. Dit is dalk selfs belangriker dat net ’n fraksie van Afrika se landboupotensiaal tans ten volle benut word. Die vasteland se landboupotensiaal geniet groot buitelandse belangstelling,” het De Klerk gesê.
Volgens die Britse koerant The Observer is sowat 50 miljoen ha van Afrika se landbougrond deur buitelandse beleggers opgeraap of in die onderhandelingsfase daarvoor.
“Dit verander internasionale indrukke oor Afrika se strategiese belang. Toegang tot Afrika se delfstof- en landboubronne raak al hoe noodsaakliker vir Europa, Noord-Amerika en Asië. Die vasteland word wéér ’n gebied waarom meegeding word. Dit is omdat opkomende ekonomiese magte – gelei deur China – skarrel vir ’n aandeel in die landbou- en delfstofbronne.”
Lees meer in Landbouweekblad se uitgawe van 5 November 2010.
2 November 2010
