Die twee bevestigde gevalle van Afrika-perdesiekte (AHS) in die Bloemfontein-gebied sal nie die aanbied van die jaarlikse nasionale Saalperdskou tydens die Bloemskou in die Rosestad negatief beïnvloed nie.
Dr. George Aldrich, voorsitter van die Saalperdgenootskap van Suid-Afrika, sê egter plaaslike veeartse behandel nog twee moontlike gevalle van dié siekte, waarvan een ’n Saalperd is. In die ander gevalle is ander rasse betrokke.
Die nasionale byeenkoms lok jaarliks sowat 920 inskrywings, wat die deelname aan die Futurity-kampioenskapsreeks insluit. Meer as 200 inskrywings word jaarliks uit die Wes-Kaap ontvang, ’n beheerde gebied vir perdesiekte.
Wes-Kaapse deelnemers
Die meeste van die Wes-Kaapse deelnemers word reeds op die skouterrein in Bloemfontein versorg in afwagting op die byeenkoms wat op 25 April afskop, twee dae voor die amptelike begin van Bloemskou.
Wes-Kaapse Saalperde sal nou met hulle terugkeer eers ’n tydperk lank onder kwarantyn geplaas word op Beaufort-Wes, Touwsrivier of George. Pogings word nog aangewend om goedkeuring vir die gebruik van kwarantynstasies nader aan die Wes-Kaap, soos op Worcester en Riversdal, te verkry.
Volgens Aldrich word die nodige voorsorg by die skoustalle getref teen muggies, wat perdesiekte versprei. “Gelukkig beperk die huidige koel toestande in Bloemfontein die aanwesigheid van muggies,” sê hy. “Die stalle by die skou word deeglik met insekdoder bespuit.”
Jongste voorvalle
Dr. Gavin Rous, streeksverteenwoordiger van die SA Vereniging vir Perdeveeartse (SA Equine Veterinary Association), sê benewens die jongste voorvalle van perdesiekte, word verskeie voorvalle van virussiektes in die gebied ondervind wat tot breinvliesontsteking by perde aanleiding gee. Dit behels die West Nile-virus, wat deur muskiete oorgedra word, Equine encephalosis-virus (EEV) en perde wat positief vir die Middelburg-virus getoets is.
Dr. Camilla Weyer, wat as ’n goedgekeurde veearts in die Wes-Kaapse beheerde perdesiektegebied optree, het telers aangemoedig om hulle perde tussen die tydperk van twee ure voor sononder en twee ure ná sonsopkoms op stal te hou en geregistreerde insekdoder teen muggies en muskiete te gebruik.
Die kontakbesonderhede van staatsveeartse kan by www.elsenburg.com verkry word en navrae oor reissertifikate kana aan dr. Camilla Weyer gerig word by equineresearchcentre@gmail.com of 083 710 2408.
