Finansiering van €40 miljoen is deur die Europese Kommissie bewillig om gemeenskappe te ondersteun in die Sahel-gebied in Afrika, wat binnekort die hoogtepunt van ’n voedselkrisis gaan bereik.
Kenners meen daar is slegs ’n paar weke tyd oor voor 18 miljoen mense deur erge honger in die gesig gestaar word. Sahel is die grensgebied in Afrika tussen die Sahara in die noorde en die meer vrugbare gebied in die suide, wat as die Soedan bekend staan.
Die geld wat die kommissie sedert die begin van die voedselkrisis en erge droogte in die Horing van Afrika en Sahel beskikbaar gestel het, staan op €337 miljoen. Luidens ’n mediaverklaring is die Europese Unie (EU) tans gasheer vir ’n hoëvlak-vergadering in Brussel wat deur amptenare van Senegal, Gambië, Mauritanië, Mali, Burkina-Faso, Niger, Tsjad en Nigerië bygewoon word.
Me. Kristalina Georgieva, die Europese Kommissaris vir Internasionale Samewerking, Humanitêre Bystand en Krisisreaksie, sê dié geld is bedoel om lewens te midde van ’n krisis te red.
“Mense regoor Sahel is tans besig om die boom van leë graanspense te skraap. Hul enigste oorblywende opsies is om hul diere en werktuie te verkoop, om die graan wat hulle vir die volgende oes moes plant, te eet.”
Toekoms
Georgieva sê hulle meen die €40 miljoen sal die mense in krisis in staat stel om te oorleef en om ’n soortgelyke krisis in die toekoms te hanteer.
Die vergadering wat tans plaasvind, fokus grootliks op die toekoms van die Sahel-gebied. ’n Inisiatief sal op die been gebring word om die gemeenskappe in staat te stel om toekomstige droogtes beter te hanteer. Die inisiatief sal bekend staan as die Alliance Globale pour l’Initiative Resilience (AGIR) Sahel.
Mnr. Andris Piebalgs, Europese Kommissaris vir Ontwikkeling, sê die EU sal in die toekoms meer fokus op hulp aan die landbou in Afrika en gevolglik voedselsekerheid. “Hierdie inisiatief is een van die sleutelfondamente waarop ons volhoubare groei, en groei wat almal insluit, kan bou.”
