Die 27ste Statebond-landboukongres het van 31 Oktober tot 4 November in Singapoer plaasgevind en Agri-Expo is genooi om hul unieke model om die landbou by verbruikers te bevorder, met die res by die kongres te deel. Die Royal Agricultural Society of the Commonwealth (RASC) bied die kongres elke twee jaar aan en “is tans die enigste spreekbuis vir die landbou in die Statebond”, luidens ’n mediaverklraing van Agri-Expo.
Die RASC bestaan uit meer as 50 landbouverenigings, navorsingsinstansies en landbougenootskappe wat werksaam is in meer as 20 Statebondslande. “Die RASC het ten doel om verbruikers bewus te maak van die landbou, asook die gepaardgaande probleme en uitdagings en om landbougenootskappe aan te moedig om uitvoering te gee aan ontwikkelingsgeleenthede en om die beeld van die landbou te bevorder.”
Vanjaar se tema was “Landbou by ’n kruispad: Die gaping tussen die stad en die platteland”. Klem is veral daarop geplaas om die jeug se betrokkenheid by die landbou te verbeter aangesien daar tans 2,5 miljard mense in die Statebond is, waarvan 60% in 2030 onder die ouderdom van 30 sal wees.
Mnr. Johan Ehlers, Agri-Expo se hoof uitvoerende beampte, het die kongres ingelig oor die werkswyse en model van dié groep. “Agri-Expo is vandag by ongeveer 30 projekte betrokke wat ten doel het om die beeld van die landbou in Suid-Afrika te bevorder,” lui die verklaring.
Agri-Expo se bedrysfbestuurder, mnr. Breyton Milford, het as nuwe generasie-verteenwoordiger tydens sy sessies die klem laat val op die betrokkenheid van die jeug in die landbou en die rol van genootskappe en groepe om ’n groter bewusmaking vir die landbou te skep. Verskeie projekte soos jeugskoue, landbouskole, inligtingsdae en skoleprogramme is uitgelig.
