Suid-Afrika se oudste landbougenootskap, Kaap die Goeie Hoop Landbougenootskap, wat handel dryf as Agri-Expo, sou oor sowat ’n dekade ophou bestaan het as die raad nie einde verlede jaar drastiese besluite geneem het oor die struktuur van die instelling nie.
Luidens ’n verklaring is Agri-Expo weens beduidende verliese as gevolg van projekte wat die afgelope paar jaar geen wins gelewer het nie, en die swak ekonomiese klimaat genoodsaak tot die drastiese besluit.
Volgens mnr. Pieter van Wyk, president van Agri-Expo, was die probleme wat die afgelope paar jaar ontstaan het, struktureel van aard. “Ons het ongelukkig te veel projekte gehad wat nie wins lewer nie, en daarmee saam ’n personeelkorps wat baie kundig is, maar wat Agri-Expo nie volhoubaar kan bekostig nie. Ons moes ons uitgawes aanpas in ooreenstemming met ons inkomste.”
Die raad het ná raadpleging met kundiges en gesprekke met personeel besluit om onwinsgewende projekte te laat vaar. Personeel wat Agri-Expo nie meer kon bekostig nie, is ook laat gaan.
Luidens die verklaring is die proses afgehandel en het die personeel wat geraak is, reeds regverdige en bogemiddelde skeidingspakette ontvang. “As ons nie hierdie moeilike besluite geneem het om nou projekte en personeel prys te gee nie, sou hierdie landbougenootskap wat 192 jaar oud is, oor bietjie meer as 10 jaar sy deure moes sluit. Ons bedank die personeel wat ons diens verlaat het, vir hul toewyding en kundige diens aan Agri-Expo en die breë landboubedryf,” sê Van Wyk.
Die raad het besluit om die volgende projekte te prioritiseer: die SA suiwelkampioenskap, die SA Jongwynskou, ondersteuning aan landbouskole (landbou-jeugontwikkeling) en sy ledeskoue (landbouskoue).
Nuwe hoofbestuurder
Mnr. Breyton Milford is ná die herstuktureringsproses as hoofbestuurder van Agri-Expo aangestel. Milford was voorheen bedryfsbestuurder by Agri-Expo en ken die organisasie goed. Die raad dui in die verklaring aan dat hy opgewonde oor Milford se aanstelling is en dat hy glo dat dié stap gaan bydra tot die nuwe era wat Agri-Expo betree.
Milford sê dis ’n reusevoorreg om die genootskap en sy lede te dien. “Ek glo dat Agri-Expo ’n nuwe tydvak betree. Ons gaan moet terugkeer na die fundamentele beginsels. Ten einde volhoubaarheid te verseker, sal nuwe projekte sterk bekostigbaarheids- en relevansietoetse moet slaag, sonder om landboubevordering te benadeel. Ek sien daarna uit om Agri-Expo opnuut te fokus en vaartbelyn te maak.”
Landbou.com het in November verlede jaar berig dat die meeste personeel by Agri-Expo afleggingsbriewe ontvang het. Volgens die organisasie se amptelike webtuiste het hy 17 personeellede in diens gehad en het hy 15 raadslede. Dit is vandag aan Landbou.com bevestig dat Agri-Expo nou vier personeellede in diens het en hy het 15 raadslede.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
