“Die komitee moet leiers ontwikkel word om te verseker dat die georganiseerde landbou gesond bly,” sê mnr. Gunther Pretorius, bestuurder van hulpbronne en ekonomie, wat voorbrand maak vir die stigting van die komitee. Die komitee sal soortgelyk wees aan die jongboerkomitees in die Wes-Kaap en Vrystaat.
Volgens Pretorius sal die komitee boere help om van ’n jong ouderdom af betrokke te raak by die georganiseerde landbou.
Hy sê van die doelstellings van die komitee sal wees om die doelwitte van Agri Oos-Kaap na te streef om só meer jong boere in te sluit en te behou binne die georganiseerde landbou. Geen lid jonger as 35 jaar dien in die algemene raad nie.
“Ek weet van ’n spesifieke area waar daar 35 boere tussen die ouderdom van 20 en 35 boer van wie nie een lid is van ’n boerevereniging en Agri Oos-Kaap nie. Die komitee moet hierdie boere van ’n jong ouderdom betrokke kry en wys wat presies aangaan.”
Die komitee sal saam met Agri Oos-Kaap werk om oplossings te vind vir die probleme in die landbou en om hul bydrae te lewer tot die toepassing van innoverende oplossings.
Die boere wat lid is van die komitee, sal jonger as 35 jaar moet wees, asook ’n lid van ’n bestaande boerevereniging en Agri Oos-Kaap. Die komitee sal onder meer deur ’n voorsitter en ondervoorsitter gelei word.
Die komitee sal ook ’n platform wees om sosiale geleenthede aan te bied om jong boere in te sluit.
Noodsaaklik
Mnr. Peter Cloete, voorsitter van Agri Oos-Kaap, glo die komitee is noodsaaklik. Dit sal ’n groep eendersdenkende boere wees wat ’n rede het om bymekaar te kom, “ en om ’n bietjie pret te hê vir samehorigheid”.
Mnr. Eben du Plessis, ondervoorsitter van Agri Oos-Kaap, sê die komitee is belangrik en dat die organisasie dit benodig. “Ons kan deur die komitee begin om in skole en universiteite of plekke soos Grootfontein jong mense op te voed en dit sal tot voordeel wees van Agri Oos-Kaap.”
Me. Wendy Vorster van Maclear sê haar boerevereniging werk hard om jong mense te oorreed om te gaan boer. “As ons iets kan doen om jong boere te oorreed om terug te kom en dat dit ’n goeie en wonderlike lewe is, en dat daar mense is wat dit met hulle kan deel, is ek ten gunste daarvan.”
