Die rassekaart wat me. Maggie Sotyu in een van haar eerste openbare optredes ná haar aanstelling as adjunkminister van Polisie gespeel het, is deur Agri SA en die TLU SA veroordeel.
Haar oppervlakkige vergelyking tussen twee regsuitsprake, sonder om na die onderliggende meriete daarvan te verwys - bloot om ‘n politieke punt te bewys - is kommerwekkend en het vertroue geskaad, sê mnr. Johannes Möller, voorsitter van Agri SA.
Volgens Möller is dit ook ironies dat die adjunkminister spesifiek voorbeelde uitlig waarby blanke boere direk of onregstreeks glo by gemoeid is. Dit skep die indruk dat daar by die adjunkminister self ‘n vooroordeel teen blankes en meer bepaald teen blanke kommersiële boere is. Sy sal moet aandui waar sy in dié opsig staan en met ‘n meer verantwoordbare beredenering haar standpunt en gesindheid opklaar.
Die TLU SA het in die sterkste terme denkbaar beswaar gemaak teen Sotyu se stelling dat blankes te lig gevonnis word deur die howe en dat hulle swaarder gestraf behoort te word. Die organisasie het ‘n beroep op pres. Jacob Zuma gemaak om Sotyu dadelik te herroep, want sy blaas rassehaat aan, en toon ’n absolute minagting vir die werk van die regbank.
“Onverantwoordelik”
Mnr. Ben Marais, voorsitter van die TLU SA, het gesê sy trap nou in dieselfde onbesonne en onverantwoordelike slagyster van sekere van haar kollegas in die verlede, deur wilde stellings te maak sonder om ’n enkele feit voor te lê om haar ongegronde stelling selfs maar net te probeer staaf nie.
Möller sê dat Agri SA op verskillende vlakke met die polisie en veiligheidstrukture van die staat goeie samewerking het om plaasveiligheid te verbeter en misdaad te bekamp. Hy het veral waardering vir die gesindheid en leidende rol van minister Nathi Mthethwa met die implementering van ‘n opgedateerde landelike beveiligingstrategie en ‘n reeks besoeke aan provinsies waar hy met verteenwoordigers van Agri SA oor dié aangeleentheid gesprekke voer. Daarom vind Agri SA dit jammer dat die adjunkminister met opmerkings van dié aard vrae oor haar insig en gesindheid laat ontstaan.
Marais sê die TLU SA is van mening dat blankes selfs swaarder gestraf word as ander. Dit het duidelik geblyk uit die vonnis wat die Skierlik-skieter gekry het, uit die feit dat ’n rugbyspeler R100 000 borg kry in verband met die dood van ’n verkeersman, terwyl die moordenaar van mnr. Eugene Terre’Blanche, slegs R5 000 borg kry. Selfs mnr. Clive Derby-Lewis se saak wys dat blankes baie swaarder gestraf word en regte ontsê word, in teenstelling met die behandeling van pres. Jacob Zuma se vriend, Shabir Shaik.
Agri SA het weer eens ‘n beroep op politieke leiers soos die adjunkminister om met haar uitsprake daarop bedag te wees dat dit kan bydra tot óf versoening en samewerking, óf polarisasie met gepaardgaande geweldsmisdaad.
10 November 2010
