Agri Limpopo gaan Agri SA vra vir ’n jaar lange moratorium op die implementering van ingrypende veranderinge in laasgenoemde se bestuurstruktuur.
’n Mosie van AgriBosveld in dié verband is by Agri Limpopo se onlangse kongres op Modimolle aanvaar. Die organisasie wil hê die beoogde verandering van Agri SA se grondwet en die veranderde memorandum van inkorporasie van die voorgestelde veranderde korporatiewe struktuur moet vir minstens ’n jaar uitgestel word.
In dié tyd wil Agri Limpopo antwoorde van Agri SA hê oor kwellinge oor dié hervormings:
¦Gaan ’n korporatiewe struktuur die besluitnemingsproses gunstig beïnvloed en hoe?
¦Hoe gaan die primêre landbou se belange verskans word in ’n direksie waarin korporatiewe lede ook dien?
¦Wat gaan die sentrums van uitnemendheid se status wees, en hoeveel uitvoerende gesag sal hulle hê?
¦Wat gaan hierdie nuwe struktuur boere kos?
¦Hoe sal ’n maatskappy tot groter landbou-eenheid bydra?
LEES OOK: Omri van Zyl stel Agri SA se saak
Duidelikheid
Agri Limpopo se lede wil duidelikheid hê oor die sterk punte, swak punte, geleenthede en bedreigings van ’n maatskappystruktuur.
Die maatskappymodel sal Agri SA basies in ’n nie-winsgewende maatskappy omskep met ’n sakevleuel, Agri SA Enterprises, wat geld sal insamel.
Die finale besluitnemingsfunksie van die algemene raad sal in die nuwe struktuur deur ’n direksie vervang word. Mnr. Christo van der Rheede, Agri SA se adjunk- uitvoerende direkteur, het op die kongres gewaarsku dat veranderende tye vernuwing in die organisasie verg.
“Daar is geen manier dat Agri SA kan voortgaan soos 100 jaar gelede nie,” het hy gesê oor struikelblokke, soos klimaatsverandering, politieke onsekerheid, misdaad en wêreldmarkte, wat ’n nuwe benadering verg.
“Nou moet ons onsself afvra: Het ons die regte mense om hierdie probleme te help takel? Is u as boere tevrede en is u bereid om daardie struktuur te finansier? Sonder geld is daar nie ’n kat se kans dat ons kundigheid kan aanstel en die struktuur kan finansier nie,” het Van der Rheede gesê.
