Agri SA het met ’n proses begin om ’n nuwe uitvoerende hoof te soek ná
die aankondiging van Van der Rheede dat sy heeltydse betrokkenheid oor ’n jaar
tot ’n einde gaan kom as hy die ouderdom van 60 bereik. “Dit was inderdaad ’n
voorreg om die landbousektor die afgelope sewe jaar in verskillende
hoedanighede te kon dien,” sê hy.
’n Kennisgewing is uitgestuur waarin belangstellendes genooi word om ’n nuwe uitvoerende hoof te benoem.
Mnr. Jaco Minnaar, president van Agri SA, sê in die kennisgewing Van der Rheede sal in ’n nuwe rol binne Agri SA ingespan word, terwyl hy ook die nuwe uitvoerende hoof sal bystaan tot sy uittrede. Agri SA se direksie het die proses begin om ’n geskikte kandidaat te soek en ’n komitee is aangestel om die proses te bestuur.
Die onderneming Signium Africa is aangestel om die komitee by te staan. Minnaar sê terwyl die proses aan die gang is, sal geen inligting met enige belanghebber gedeel word nie. “Die direksie sal ’n aankondiging doen sodra hy die suksesvolle kandidaat goedgekeur het.”
In die soektog na ’n geskikte kandidaat word die pos intern en ekstern geadverteer. Signium Africa doen ook sy eie navorsing en almal word genooi om kandidate te benoem wat vir die pos geskik. Benoemings kan tot 13 Maart 2023 direk aan Signium Africa verskaf word met die kandidaat se naam, posisie en werkgewer, asook kontakbesonderhede en die beroepsagtergrond van die persoon.
Mense word egter gevra om nie die kandidate wat hulle wil benoem direk te nader nie, sodat daar nie verwagtinge geskep kan word nie. Die proses sal deur Signium Africa behartig word.
Die vereistes waaraan ’n kandidaat moet voldoen, sluit in:
* ’n Meestersgraad in politieke administrasie en openbare leierskap, of MBA of MSc in landbou-ekonomie of ander relevante kwalifikasies.
* Agt tot tien jaar ervaring op senior bestuur- en raadsvlak.
* Bewese beroepsgeskiedenis in leierskapsrolle sowel as strategiese- en besluitnemingsposisies op korporatiewe en bedryfsvlak.
* Kennis en ervaring van die landbousektor.
* Deeglik kennis en ervaring van regeringstesels en prosesse, asook die ekonomie en landbou-ekonomie.
* Die vermoë om neigings op politieke, ekonomiese, maatskaplike, tegnologiese, omgewings en regsvlakke wat die landbou kan raak, te identifiseer en te bepaal wat die strategiese rigting is wat Agri SA moet inslaan om risiko’s te verminder.
* Die vermoë om strategiese beleidsopsies holisties te beskou en dit in resultate te omskep deur goeie bestuur.
* Die vermoë om interaksie met ander belanghebbers in die bedryf, asook hooggeplaastes te handhaaf.
* Die vermoë om doeltreffend te onderhandel en konflikte te hanteer met oopheid en ontvanklikheid.
* Die vermoë om goeie mediaverhoudinge te handhaaf en om belangrike kwessies vir die landboubedryf in die media te hanteer, openbare persepsies van die landbou gunstig te beïnvloed en ’n bewustheid van landbou se belankgrikheid te skep.
* ’n Goeie kommunikasievermoë in Engels en Afrikaans.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
