Dit is volgens die fonds egter bloot ’n druppel aan die emmer gegewe die massiewe skaal – en koste – van misdaad in die landbousektor.
Die fonds het 22 aansoeke vanaf boereverenigings in Noordwes, KwaZulu-Natal, die Oos-Kaap, Mpumalanga en die Vrystaat ontvang. Luidens ’n verklaring deur die fonds is die behoefte egter oorweldigend. In 2018 alleen het die totale koste van landboumisdaad R7,72 miljard oorskry, met die installering van beveiligingstoerusting ter waarde van R1,9 miljard.
“Die mate waartoe die boerderygemeenskap blootgestel is aan geweld en eiendomsverwante misdaad is ’n groot probleem vir die sektor en het ’n nadelige impak op voedselsekerheid sowel as landbou-investering,” luidens die verklaring.
Mnr. Cobus van Zyl, voorsitter van die Agri Securitas-trustfonds, sê die boerderygemeenskap se veiligheid is ’n voedselsekerheidskwessie. “Die kwesbaarheid van boere- en landelike gemeenskappe is nie bloot ‘n boere-aangeleentheid nie, maar van nasionale belang. Daarom is dit belangrik om by te dra tot boerderygemeenskappe se paraatheid om hulself en hul werkers te beveilig.”
Die Agri Securitas-trustfonds is in 1999 gestig om met die samewerking van plaaslike gemeenskappe en die polisie met die beveiliging van boere en plaaswerkers te help. Sedert sy stigting het die fonds meer as R16 miljoen uitbetaal danksy skenkings van die private sektor.
Van Zyl sê hierdie finansiering vul kritieke tekort aan die staat se polisiëringskapasiteit aan. “Die meeste finansieringsaansoeke wat van boereverenigings ontvang word, was vir die installering of uitbreiding van kamerastelsels. Volgens plaaslike gemeenskappe, is hierdie die suksesvolste meganisme aangesien dit dien as afskrikmiddel en ook help met die opsporing van verdagtes. Die kamerastelsels dek groot dele van landelike gebiede en bied waardevolle inligting met betrekking tot misdaadondersoeke.”
Mnr. Christo van der Rheede, uitvoerende direkteur van Agri SA, sê die organisasie is dankbaar vir Agri Securitas-trustfonds se finansiering, asook die skenkings van korporatiewe instellings en ander belanghebbendes in die private sektor se skenkers. “Ons doen ’n beroep op Suid-Afrikaners om voort te gaan om die trustfonds te ondersteun ten einde hierdie gaping te vul. Dit is die skenkings wat bydra dat boeregemeenskappe beveilig kan word en voedsel kan produseer sodat ons land se mense kos op die tafel het.”
Van der Rheede rig ook ’n dringende versoek tot mnr. Bheki Cele, minister van polisie, om die doeltreffende toepassing van die landelike beveiligingstrategie te bespoedig. “Dit is die enigste werklike manier om misdaad in boerderygemeenskappe te bekamp, om lewens en besighede te beskerm en om voedselsekerheid vir toekomstige geslagte Suid-Afrikaners te handhaaf.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
