Mnr. Danie Malan van Allesverloren in die Swartland is die eerste wynmaker in 53 jaar wat dit kon regkry om Swede se hoogste wyntoekenning in te palm en daarmee op die vlak van Nobelpryswenners vereer te word.
Malan, wat veral bekend is vir sy bekroonde Shiraz-wyne, het die Swede uitgeboul met drie rooiwyne: ‘n Tinta Barocca, Shiraz en Touriga Nacional, en ‘n port.
Dit het die hoogste punte behaal in ‘n blinde proe-evaluering van 4200 wyne wat by dié land se kleinhandel-monopolie Systembolaget beskikbaar is. Hy is as internasionale produsent van die jaar bekroon en met ‘n Goue Glas – Swede se hoogste eerbetoon, wat ook aan Nobelpryswenners toegeken word – beloon. Die kompetisie is 53 jaar gelede uitgevaardig, maar ‘n Suid-Afrikaanse produsent het dit nog nooit gewen nie.
Buitelandse trofee
“My pa het in 1989 die tweede buitelandse trofee vir die Suid-Afrikaanse wynbedryf by Vinexpo (in Bordeaux) met ‘n Allesverloren Shiraz 1982 gewen. Hopelik wys hierdie nou ons kyk mooi na sy besigheid,” sê Malan.
Die toekenning beteken nie net baie vir Allesverloren nie, maar ook vir die res van die bedryf.
“My invoerder in Swede is in trane van blydskap en die mense van Wosa is net so bly. Dit is absoluut wonderlik; hierdie is gróót,” het ‘n oorstelpte Malan gesê. Hy was op ‘n blitsbesoek na Stockholm waar hy sy prys in ontvangs geneem het.
Sowat 60% van Malan se wynuitvoere gaan Swede toe. Die Suid-Afrikaanse wynbedryf is tans die grootste rolspeler in Swede en besit sowat 34% van die wynmark.
“Ons het die laaste paar jaar baie goed gedoen,” vertel Malan.
Sy wyne word ook in Suid-Afrika hoog aangeslaan en die Touriga Nacional het ‘n goue medalje by die Veritas-kompetisie gewen.
26 November 2010
