Terwyl droogte plaaslike mielieboere laat tande kners, het die mielieseisoen in die Noordelike Halfrond op ’n hoë noot begin.
Aanduidings is dat Amerikaanse boere die meeste hektare in 75 jaar gaan plant. Die Internasionale Graanraad (IGR), het pas aangekondig dat die mielie-oes wêreldwyd in 2012/’13 die grootste in die geskiedenis kan wees.
Danksy ’n buitengewoon warm lente met rekordhoë temperature kon die Amerikaners vroeg al die planters laat dreun. Teen begin vandeesmaand was 3% van hul beoogde aanplantings al in die grond – die vroegste begin van hul planttyd sedert ten minste 1980, het die nuusdiens Bloomberg berig.
100 miljoen ton meer
Die beter opbrengste wat vroeë aanplantings gewoonlik lewer, is ook ’n faktor wat die IGR waarskynlik in berekening gebring het toe hy geskat het dat die wêreldproduksie van mielies hierdie bemarkingsjaar met meer as 4% tot ’n rekordvlak van 900 miljoen ton kan styg. Dit is 100 miljoen ton meer as wat boere die wêreld oor net vier seisoene gelede nog geproduseer het.
Die verwagte rekordproduksie ten spyt, bly wêreldvoorrade steeds relatief knap, wat pryse hoog hou. Pryse op Chicago se graanbeurs het verlede week skerp gestyg nadat die Amerikaanse regering sy plaaslike voorraad laer geskat het as wat die mark verwag het. Dit is nou 8% laer as ’n jaar gelede en op ’n vyf-jaar-laagtepunt.
Net soos in Chicago, is ál die mieliepryse op die plaaslike Safex-beurs steeds aansienlik hoër as verlede jaar dié tyd. Die April-witmielieprys is nou sowat 30% hoër as ’n jaar gelede, die April-geelmielieprys is 23% duurder, die Julie-witmielieprys is 18% hoër en die Julie-geelmielieprys is 14% op.
Die naaste maand-kontrakte het wel in Maart gedaal – die April-geelmieliekonrak met 12% en die April-witmieliekontrak met 1%. Die kontrakte vir lewering in Julie het egter verder verstewig, naamlik wit mielies met 5% en geel mielies met 4%, aldus mnr. Barrett Schoeman, mark-ekonoom van Graan SA.
10 April 2012
