Die voorstel dat buitelanders nie meer grondeienaars in die land kan wees nie, maar vir ‘n minimum van 30 jaar grond kan huur, sal geensins nadelig vir landbouproduksie wees nie, sê minister Senzeni Zokwana, Minister van Landbou, Bosbou en Visserye.
Pres. Jacob Zuma het in sy staatsrede die spreekwoordelike “rubberstempel” op die grondhervormingsvoorstelle van die ANC geplaas.
Dit is dat die maksimum grondplafon 12 000 hektaar gaan wees; dat buitelanders nie toegelaat sal word om grond te besit nie maar slegs te huur; asook die skrapping van die gewillige koper/-verkoper model.
“Pres. Zuma wil met die beklemtoning van die huurkontrakte uitwys dat jy nie ‘n plaas hoef te besit om te kan boer nie,” het Zokwana gesê.
“Dit kan werk as ons ‘n huurkontrakstelsel het wat op ‘n kostedoeltreffende manier gedoen kan word en die boer se gewasse verseker kan word. Met ‘n huurkontrak van 30 jaar kan jy 'n bankwaarborg kry, maar nie met ‘n vyfjaar-huurkontrak nie,” het Zokwana gesê.
Dr. Pieter Mulder, leier van die VF Plus, het gesê Zuma stuur ‘n botsende boodskap aan buitelandse beleggers. “Die een oomblik, by Davos, smeek hy buitelanders om in Suid-Afrika te kom belê. Die volgende oomblik sê hy in die staatsrede dat buitelanders geen grond in Suid-Afrika mag besit nie.”
Die plafon wat op grondbesit geplaas word, los geen probleme op nie, maar wys slegs hoe min begrip die ANC het vir die moderne ontwikkelde landbou. Hierdie voorstel gaan nie die EFF se guns wen nie, maar wel onsekerheid in die landbou verhoog en voedselsekerheid verder in die gedrang bring, het Mulder gesê.
