Mnr. Thandeka Mbabama, DA-LP, sê die DA verwelkom die hof se uitspraak. Die trust word nou verplig om die sluit van huurooreenkomste met die okkupeerders van kommunale grond op te skort en moet alle huurinkomste terugbetaal wat tot dusver ontvang is.
“Buiten om hierdie mense in beperkende huurooreenkomste vir grond te dwing, het die Ingonyama-trust mense huurders van hul voorvaders se grond gemaak. Hierdie benadering het veral ’n ongunstige impak op vroue gehad aan wie daar gesê is dat hulle slegs huurooreenkomste in ’n man se teenwoordigheid kon sluit.”
Mbabama sê die appèlhof se uitspraak gee hoop aan okkupeerders van kommunale grond landwyd wie se sekerheid van verblyfreg nog altyd onseker was weens paternalistiese stelsels vir grondadministrasie.
“Dit is selfs belangriker dat dié uitspraak nou die onus op die parlement en die departement van landbou, grondhervorming en landelike ontwikkeling plaas om met wetgewing vorendag te kom wat die regte van okkupeerders van kommunale grond sal verskans en beskerm. Indien dit nie gebeur nie, sal dit verraad wees teenoor die landelike bevolking wat al jare baklei vir sekerheid van verblyfreg.”
