Alternatiewe maniere om grondplafonne toe te pas, word binne die eenheidsforum vir die landbou (Asuf) bespreek.
Mnr. Japie Grobler, Asuf-voorsitter, het in die kykNET-reeks 2014 se episode oor grondhervorming gesê “te groot boere” moet dalk in staat gestel moet word om, wanneer hulle uitbrei, swart ekonomiese bemagtiging (SEB) daarby in te sluit.
Grobler het by navraag aan Landbouweekblad gesê mnr. Gugile Nkwinti, Minister van Landelike Ontwikkeling en Grondhervorming, asook van Asuf se lede, dring op plafonne aan. Daarom word verskillende moontlikhede nou binne Asuf “rondgeskop”.
“Dalk het ons verskillende soorte grondplafonne nodig. Miskien moet dit so wees dat as ‘n baie groot boer wil uitbrei, hy verplig moet word om SEB daarby in te sluit?
“Só word die boer nie gekeer om uit te brei nie, maar sy uitbreiding is ook in belang van herverdeling en restitusie.”
Grobler sê een van die ander voorstelle op die tafel is dat daar in groot boere se geval ‘n langer eerste reg aan die staat moet wees. Sou so ‘n boer dus grond wil verkoop, moet die staat langer tyd hê om te besluit of hy die grond wil koop.
Mnr. J.P. Landman, ekonoom, is die aanbieder van die 2014-reeks Sondagaande waarin na die tweede dekade van Suid-Afrika se demokrasie gekyk word.
Volgens Grobler is daar ‘n groot aanvaarding in Suid-Afrika dat die land kommersiële boere nodig het.
Die land het egter nou ‘n doeltreffende grondregister nodig, sodat ‘n mens kan weet watter grond in staatsbesit is en dié grond doeltreffend gebruik kan word.
