Daar is steeds groot belangstelling onder Suid-Afrikaanse boere om hul belange na Georgië uit te brei.
Benewens drie gesinne en ’n gesamentlike groep boere wat reeds daar boer, is sowat 15 ander partye ook besig met beleggings daar. Mnr. Bennie van Zyl, hoofbestuurder van die TLU SA, sê die beleggings is meestal landbouverwant en wissel van die aankoop van grond tot die vestiging van ondernemings.
Meer inligting
Die TLU SA hou weer op 2 Februarie om 10:00 ’n inligtingsvergadering by sy hoofkantoor in Pretoria om inligting te verskaf oor vanjaar se beoogde inligtingstoere aan Georgië en die jongste verwikkelinge in die land.
Die inligtingstoere spruit voort uit die TLU SA se ooreenkoms met Georgië om die land se landbousektor te help regruk ná die agteruitgang toe dit nog deel van die ou Sowjet-unie was.
“Die eerste besoek word beoog vir die week van 23 tot 27 April en ons wil sowat 50 belangstellendes saamneem. In dié week gaan ’n landboukonferensie in Tbilisi, die hoofstad, gehou word waaraan die besoekersgroep sal deelneem. Die Suid-Afrikaanse boere wat reeds daar is, sal dit ook bywoon.”
Die eerste Suid-Afrikaanse boer wat daarheen verhuis het, mnr. Piet Kemp, se tweede koringoes is reeds op die lande en hy wag vir die sneeu om te smelt sodat hy kan stroop. Lees hier 'n onderhoud met Kemp deur Hugo Lochner, Landbouweekblad-redakteur.
Nóg ’n gesin, mnr. Francois en me. Juanita Venter, is besig om tonnels vir ’n groenteboerdery wes van Tbilisi, op te rig en ’n ander egpaar, mnr. Frank en Charntelle Koch, het eers ’n woonstel gehuur en is besig om verskillende boerderymoontlikhede te oorweeg.
Besproeiingsplaas
’n Groep van 12 Suid-Afrikaanse boere het saam ’n maatskappy gestig wat nou onder leiding van mnr. SW Kruger besig is om ’n besproeiingsplaas te ontwikkel.
Kyk hier na 'n video oor die Suid-Afrikaanse boerderybedrywighede in Georgië.
Van Zyl sê meer lugrederye het nou vlugte na Georgië ingestel en vliegkaartjies het goedkoper geword. Daar sal binnekort meer inligting oor die eerste georganiseerde toer bekend te maak.
* Dit is nie net Suid-Afrikaanse boere wat in Georgië floreer nie, maar ook goeie wyn! Kyk hier na 'n video oor die wynbedryf in Georgië.
19 Januarie 2012
