As ‘n verbruikers klas-aksie wel voortgaan, kan bakkers betrokke by prysknoeiery met brood ‘n verdere R460 miljoen se skadevergoeding betaal.
Dít volg na vier organisasies in die Wes-Kaap besluit het om ‘n klas-aksie te loods teen die bakkers wat skuldig bevind is aan betrokkenheid by die broodpryskartel.
Die Nasionale Verbruikersforum, die Kinderhulpbronnesentrum, Black Sash en Cosatu in die Wes-Kaap het vroeër vir dié klas-aksie in die Wes-Kaapse Hooggeregshof aansoek gedoen. Dié aansoek is egter van die hand gewys.
Luidens ‘n berig op Moneyweb sê mnr. Charles Abrahams, regsverteenwoordiger vir die organisasies, hulle wil met die aksie voortgaan ondanks die bevinding op 26 November. Hy sê die skadevergoedingseise sal sowat R460 miljoen beloop.
Kan voortgaan
Volgens Abrahams wou hulle met die aanvanklike aansoek voor-verhoor klas-aksiestatus bekom. Na die bevinding gaan sy kliënte nou voort om skadevergoeding te eis sonder die sertifisering van ‘n klas-aksie. “Die aksie kan steeds voortgaan ondanks daarvan dat sy aansoek gefaal het,” lui die berig.
Abrahams sê die probleem wat hulle by dié verhoor ondervind het is dat daar binne die bestaande wette geen duidelike voorskrifte oor hoe klas-aksie aansoekers met hul aansoek te werk moet gaan, bestaan nie. Hy sê in 1998 het die Suid-Afrikaanse Wetskommissie sekere aanbevelings oor klas-aksies gemaak, waarvolgens ‘n hof die aksie moet sertifiseer sodat litigasie teen die ander party ingestel kan word.
Die groepe is van plan om skadevergoeding nie net van Tiger Brands en Pioneer Foods, wat reeds groot boetes betaal het, te eis nie, maar ook van Premier Foods, teenoor wie die Mededingingskommissie korporatiewe toegeeflikheid gewys het.
7 Desember 2010
