Deesdae is dit nie ongewoon om verby ’n winkelrak te stap en produkte soos vegetariese biltong, plantgebaseerde frikkadelle of selfs vegan-hoenderrepies te sien nie.
Luidens ’n verklaring deur die departement is die benaming van dié produkte nie in ooreenstemming met ’n bepaling in Regulasie 1283 wat die klassifisering, verpakking en merk van verwerkte vleis vir verkoop in Suid-Afrika reguleer nie.
Ingevolge dié regulasie verwys “verwerkte vleis” na enige vleis wat enige aksie ondergaan het wat sy oorspronklike toestand aansienlik verander, onder meer verhitting, droging, fermentering of marinering. Rou verwerkte vleis word nie hierby ingesluit nie.
Luidens die departement se verklaring sal die voedselveiligheidsagentskap verwerkte vleisprodukte ondersoek en ingevolge afdeling 8 van die Wet op Landbouproduktestandaarde (Wet 119 van 1990) beslag lê op enige vleisalternatiewe produkte wat produkname gebruik wat vir verwerkte vleisprodukte gereserveer is.
Mnr. Gerhard Schutte, voorsitter van die Rooivleisprodusente-organisasie (RPO), sê die organisasie verwelkom die departement se verklaring. “In die rooivleisbedryf sê ons altyd die verbruiker is koning en koningin en moet behoorlik ingelig wees. Dit is baie misleidend dat vleisalternatiewe hierdie tipe jargon, wat aan die vleisbedryf gekoppel word, gebruik om hul eie produkte te bevoordeel.”
Hy sê die bedryf sal ook moet toesien dat die regulasies rondom die benaming van produkte toegepas word en selfregulering toepas as probleme opgemerk word.
