Al Mabroor Agri, ’n afdeling van die Al Mabroor-beleggingsmaatskappy wat dit vir Moslem-sakelui moontlik maak om in projekte te belê wat ooreenstemming is met die sjaria-voorskrifte, het pas by die mededingingskommissie toestemming gekry om die beesvleismaatskappy Beefcor te koop.
Al Mabroor het die landbousektor in 2014 betree as ’n nuwe belanghebbende in kommersiële beesboerdery en in die voerkraalbedryf met die samewerking van Douglas Beef in die Noord-Kaap.
Tans besit die maatskappy omtrent 55 000 beeste en lewer van 1 000 tot 1 200 diere per week aan ’n slagplaas. Beeste word ook reg oor die land op veilings verkoop.
Die kommissie sê luidens ’n verklaring dat albei maatskappye in die beesvleiswaardeketting betrokke is en dat hul samesmelting nie ’n noemenswaardige impak op mededinging in enige relevante mark sal meebring nie.
Albei partye het ingestem tot ’n moratorium op posbesnoeiings wat uit die samesmelting kan voortspruit om kommer oor werksverliese uit die weg te ruim.
Die partye het ook ingestem om ’n plan vir werknemeraandeelhouding toe te pas nadat die kommissie bevind het dat die samesmelting geen verbetering vir voorheen benadeelde persone ten opsigte van eienaarskap inhou nie. Hulle het ook ingestem om inisiatiewe te bevorder wat dit vir voorheen benadeelde boere moontlik sal maak om tot die formele sektor toe te tree en hul deelname uit te brei.
Al Mabroor het die afgelope jaar ook op klein skaal begin diversifiseer in skaapboerdery, makadamia- en groenteproduksie.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
