Sedert die departement van landbou, grondhervorming en landelike ontwikkeling einde April ’n verslag oor die stand van sake beskikbaar gestel het, is 15 bykomende gevalle van bek-en-klouseer op kommunale weigrond in KwaZulu-Natal geïdentifiseer.
Twee van die nuwe gevalle is buite die siektebeheergebied, wat vroeër vandeesmaand vergroot is. Twee persele buite die beheergebied is onder kwarantyn geplaas. Sowat 80 000 beeste is tot dusver in die siektebeheergebied ingeënt.
Nog ’n geval is op ’n plaas in Noordwes aangemeld. Twee plase in Gauteng wat met die uitbreking in Noordwes verbind word, is ook geïdentifiseer. Van die plase se beeste is van kant gemaak en die plase is onder kwarantyn geplaas.
Mnr. Gerhard Schutte, voorsitter van die nasionale dieregesondheidsforum en hoofbestuurder van die Rooivleisprodusente-organisasie (RPO), sê die nuwe gevalle in KwaZulu-Natal is te verwagte aangesien die meeste daarvan binne die siektebeheergebied val. Die RPO het onlangs Noordwes besoek en is optimisties dat daar nie ’n skerp toename in die aantal gevalle sal wees nie aangesien ernstige pogings aangewend word om die verspreiding van die siekte te bekamp.
“Natuurlik is ons steeds bekommerd, maar die probleem word met redelike erns hanteer en min. Thoko Didiza begin nou self ingryp. Ons hou daarvan. Solank daar politieke wil en bedryfswil is, sal ons hierdie ding reg kry.”
Hy sê die beperkings op die beweging van diere word nie doeltreffend toegepas nie. “Ons het gesien dit het nie gebeur in Limpopo nie, ook nie in KwaZulu-Natal nie en nou sien ons dat dit in die ander provinsies ook nie gebeur nie.
“Die dae dat boere op die staat kan staatmaak om hierdie beperkings toe te pas, is verby. Ons sal moet selfreguleer om te verseker dat diere nie afgelaai word waar ons nie daarvan hou nie. Ons moet aanvaar dat daar ’n gebrek aan kapasiteit is en saam met die regering werk om hierdie probleem op te los.”
Die protokol vir beweging is beskikbaar by https://bit.ly/39YcdTm.
