Luidens ’n verklaring van die Vrystaatse departement van landbou en landelike ontwikkeling volg die ondersoek ná verdagte bewegings van beeste vanaf Noordwes en Gauteng na die Vrystaat.
Twee plase in die distrik Viljoenskroon word tans ondersoek. Die diere is verkry vanaf ’n plaas in die distrik Potchefstroom waar diere positief vir bek-en-klouseer getoets het. Dan is daar ook van die vee wat onlangs by Potchefstroom met bek-en-klouseer gediagnoseer is, wat op 18 Maart op ’n veeveiling in Potchefstroom verkoop is, luidens die verklaring.
Noordwes se dieregesondheidsowerhede het vasgestel 217 beeste, skape en bokke wat op dié veiling gekoop is, is na die distrikte Vanderbijlpark, Westonaria en Kempton Park in Gauteng, na die Vrystaat, en na die distrikte Ventersdorp en Potchefstroom in Noordwes vervoer.
’n Plaas in die distrik Frankfort word ook ondersoek vir ’n moontlike uitbreking van bek-en-klouseer. Dit volg ná die verkryging van kalwers van ’n veespekulant in Roodepoort. “Al die diere wat deur die Vrystaatse boere gekoop is, word verbind met moontlike onwettige beweging van beeste vanaf Limpopo, waar die aanvanklike uitbreking aangeteken is,” sê dr. Kristan Mojapelo, direkteur van veeartsenykundige dienste in die Vrystaat.
“Veeartsenykundige personeel het al drie die plase wat geraak word, besoek en die voorgeskrewe monsters geneem. Diere op een van die drie plase wat ondersoek word, het kliniese tekens getoon wat tipies van bek-en-klouseer is.”
Al drie plase is onder kwarantyn geplaas om verdere verspreiding te voorkom. Die departement wag nog vir die uitslae van die toetse. As bek-en-klouseer bevestig word, sal die departement die nodige beheermaatreëls instel, sê Mojapelo.
Bek-en-klouseer is ’n hoogs aansteeklike virussiekte by diere met gesplete hoewe – hetsy of hulle plaas- of wilde diere is. Die siekte het geen effek op mense nie en vleis van siek diere is veilig om te eet mits dit op die voorgeskrewe manier hanteer word.
